ጉዞ ወደ ሱዳን

ዓባይ በረሃ መግቢያ፡፡ ፈረሶች ከተለያዩ አካባቢዎች ይሰበሰቡና በጎንደር መተማ በኩል ለሱዳን ገበያ ይቀርባሉ፡፡ ይህ ጉዞዋቸው በእግር ሲሆን፣ ዓባይ በረሃን ማቋረጥም የጉዞው አካል ነው፡፡ (ፎቶ በታምራት ጌታቸው)

* * *

ማምንድነው

ባልተስተዋልኩበት የልቤን አውጥቼ

እንዳልሰማሁ ሆኜ ሁሉንም ሰምቼ

ያጋጣሚ ሆኖ ‹‹ያርባ ቀን ዕድሌ››

ሚኮነውን ልሆን ባለመታደሌ

ንቀትና በደል እንዳላየሁ አይቼ

መች ነገሩ ጠፍቶኝ

መች ሳላውቅ ቀርቼ፡፡

ሰምሮልሃል ቢሉኝ

ያልሆነውን ቀና

ሳልደርስ መመለሴ

ከድል ፈር ጎዳና

መሆን የሚገባው መች ሆኖ ያውቅና

ቅጥፈት ቀንቷት ስትገን

እውነት ግን ታፍና፡፡

• ዮሴፍ ሰቦቃ

* * *

ባለአምስት ኮከብ ሆቴል ጥልቅ የውኃ ገንዳ ውስጥ እየተገነባ ነው

በሻንጋይ አንድ ግዛት ውስጥ ሺማኦ በተባለ የግንባታ ተቋራጭ ጥልቅ የውኃ ገንዳ ውስጥ ባለአምስት ኮከብ ሆቴል እየተገነባ መሆኑን የሚረር ዘገባ አመለከተ፡፡

የሆቴሉ 383 የእንግዳ ማረፊያ ክፍሎችም በሆቴሉ የውኃ ውስጥ ፎቆች ላይ የሚገኙ መሆናቸው ተገልጿል፡፡ ምንም እንኳ በግንባታ ላይ ያለው ሆቴል እስከሚቀጥለው ዓመት ለአገልግሎት ክፍት የማይሆን ቢሆንም የውስጥ ዲዛይኑን በሚመለከት ዓለም አቀፍ ጨረታ መውጣቱ በዘገባው ተገልጿል፡፡

ሆቴሉ የሚገኝበት ቦታ በተፈጥሮ ውበት የተቸረው በመሆኑ የሆቴሉ ዲዛይንም ይህን ውበት ይበልጥ የሚያንፀባርቅ እንዲሆን ይፈለጋል፡፡ ሆቴሉ እየተገነባበት ያለው ገንዳም 90 ሜትር ጥልቀት ያለው ነው፡፡

ሆቴሉ የመናፈሻ ቦታዎች፣ የእንግዳ ማረፊያዎች፣ እስከ 1000 ሰው የሚያስተናግዱ የስብሰባ አዳራሾችና የስፖርት ማዘውተሪያ እንደሚኖረው ተጠቁሟል፡፡ ይህ ሆቴል ምናልባትም እስከዛሬ ከተሠሩት ሆቴሎች እጅግ አረንጓዴው እንደሆነ እየተነገረ ነው፡፡

* * *

በዘረመል ምህንድስና የተፈጠሩ አሳማዎች የውስጥ አካል ለሰው ሊሆን ይችላል ተባለ

በዘረመል ምህንድስና የተፈጠሩ አሳማዎች የውስጥ አካል በቀዶ ሕክምና ጭላዳ ዝንጀሮ ላይ ተደርጐ ዝንጀሮው ለሁለት ዓመት ጤናማ ሆኖ በመቆየቱ የእነዚህ አሳሞች አካል ለሰው ሊሆን እንደሚችል ተስፋ መኖሩን ሳይንቲስቶች ገልጸዋል፡፡

የሚረር ዘገባ እንደሚያሳየው ይህ ሳይንሳዊ እርምጃ እንደ ኩላሊት ያለ የውስጥ አካል ለማግኘት ያለውን ፈተና ያቀልላል፡፡ ሳይንቲስቶቹ እዚህ ደረጃ ላይ የደረሱት ችግር የነበረበትን የጭላዳ ዝንጀሮ ልብ በአሳማ ልብ በመተካት ጭላዳ ዝንጀሮውም ለሁለት ዓመት በጤና መኖር መቻሉ በመረጋገጡ ነው፡፡ እስከዚህ ጊዜ ድረስ ግን ተመሳሳይ ቀዶ ሕክምና የተደረገላቸው እንስሳት የኖሩት ከስድስት ወር ለማይበልጥ ጊዜ ነበር፡፡

እነዚህ ከአሳማ የሚወሰዱ የውስጥ አካሎች በትክክልም የሰው አካልን ተክተው ውጤታማ እንዲሆኑ አሳሞቹ በዘረመል ምህንድስና ሲፈጠሩ አምስት የሰው ዘረመል እንዲኖራቸው ተደርጓል፡፡ በዚህ መልኩ ለሰዎች የሚደረገው የቀዶ ሕክምና በሚቀጥሉት ጥቂት ዓመታት ውስጥ እንደሚሆን ይጠበቃል፡፡ ተመራማሪዎቹ አሳማዎቹ ላይ የሚደረገው ጥናት እንደሚቀጥል በተለይም ደግሞ በዕድሜ ገና የሆኑ አሳሞች የውስጥ አካል ለሰዎች በደንብ የሚሆን መጠን እንዳለው እያስረዱ ነው፡፡

* * *

መሬት መንቀጥቀጥ የማይበግረው አልጋ

ተፈጥሮአዊ አደጋዎችን በተለይም መሬት መንቀጥቀጥን መቋቋም የሚችል አልጋ በመሥራት ዋንግ ዌንዚ የተባሉ ቻይናዊ የባለቤትነት ማረጋገጫ ማግኘታቸውን ቻይና ዴይሊ ዘግቧል፡፡ የፈጠራ ባለቤትነት ማረጋገጫው የተሰጠው እ.ኤ.አ. 2010 ላይ ነበር፡፡

አልጋው የሬሳ ሳጥን የመሰለ ቢሆንም የታሸገ ውኃ፣ የታሸጉ ምግቦች፣ ድምፅ ማጉያ፣ ባትሪዎችና የእሳት ማጥፊያ ያለው ነው፡፡ ይህ የሆነው ደግሞ በአደጋ ወቅት የነፍስ አድን ሠራተኞች እስኪደርሱ ሰዎች ነፍሳቸውን ለማቆየት፤ ያሉበትን አካባቢም ማወቅ እንዲችሉ መሆኑ ተገልጿል፡፡

በደቡብ ካሊፎርኒያ የመሬት መንቀጥቀጥ ማዕከል ኤክስፐርት የሆኑት ማርክ ቤንቲን ለሲኤንኤን ‹‹የሚያስፈልጉ ነገሮች ሁሉ ባሉበት የብረት ሳጥን ውስጥ መሆን መጥፎ ነገር አይደለም፡፡ ግን በጣም ወጪ የሚጠይቅ ነው፤›› ብለዋል፡፡

የፈጠራው ባለቤት የሆኑት ጡረተኛው የ66 ዓመቱ ሚስተር ዌንዚ በዕድሜያቸው ተደጋጋሚ የመሬት መንቀጥቀጦችን በማየታቸው በመጨረሻ በመሬት መንቀጥቀጥ ምክንያት የሚደርስን ሞት ለመቀነስ በማሰብ እዚህ ፈጠራ ላይ መድረሳቸውን አስረድተዋል፡፡